Апел за предизборен инцидент

Еве и ја во духот на најактуелните настани кои земаат се поголем замав, претстојните избори, се спремам за истите преку планирање на најизборниот меѓу најизбраните настани во тој период – изборен инцидент. Моето лично сценарио за истиот е следно:
Пред одредни, во однос на тоа колку економските услови дозволуваат, изборни места би поставил штандови со сендвичи и сокчиња. Истите ќе ги делам бесплатно на секој гласач кој ќе дојде со било каков доказ, барем и во форма на усна изјава дека тој или таа се барем минимално задоволни од градоначалникот (не само Триперовски) во заминување. Односно секој оној кој ќе илустрира дека барем 25% од ветувањата на кандидатот од претходните избори се остварени.
По два сендвича и три сока ќе нудам за секој оној кој ќе ми фино објасни зошто , и покрај можноста од веќе постоечко чуство на разочараност, повторно излегува да гласа и зошто токму за кандидатот за кој се одлучил.
A пошто и во двата случаи ќе остане поолно храна и пијалоци (ради ситуација кеч22 меѓу останатото) ќе мора да го реформулирам барањето "Oд од што сте задоволни?" во "Oд што не сте?". А поради тоа што немам тенденции да станам супер ТВ (комерцијаелн) психијатар како Јанко, нивните прозаично-долги изјави ќе ги побарам во писмена форма со нотарска заверка за која изјавувачот би бил награден со 150 денари. Плус сангвич се разбира. А како би ја нагласил агресивната природа на инцидентите, теткински упорно ќе ги терам луѓето да си земат и уште по малку од ова и од она, иако за тоа и не ќе има потреба. А тоа ќе го правам со подигнати веѓи кои велат "Цел ден сум го правел ова, Земи!, мораш да пробаш".

Е сеа, што после ќе правам со изјавите уште не сум најсигурен. Ако бројката е голема, би можеле да се продадат како доказен материјал (кој би се искористил или уништил во зависност од потребите), или би можел да си ја исполнам сопствената емотивна желба на самозадоволна насмевка при коментарот упатен кон секој жалопоен гласач "Мрш У(ј)ПМ и да не те слушам повеќе". Но со сигурност знам дека не сакам ништо да докажувам на сегашните владетели. Друга можност е да се состави едно книжуле од сите нив и им се достави до ЕУ како поткрепа и благодарност за нивните залагања за подобрување и развој на демократските процеси во нашата држава. Чунки ако нема стапови и камења на изборните места, се е во ред.

И така, доколку некој се согласува со оваа идеа за предизборен инцидент и би сакал истата да ја потпомогне, ќе молам истото да го стори во форма на маргарин, путер или било каков сендвич мастраф, или пак донација од тетра-сок во најмала рака. Поимошните можат да донираат и по 150 денари за нотар. А најзагреаните за инцидент ги повикувам да одвојат по ДЕСЕТ денари од својот џеб кои ќе бидат им бидат врачени на кандидатите-градоначалници во моментот на нивното излегување на гласања. На пример 100 луѓе демнат по цел ден и штом се појави Коце, сите му фрлаат по 10ка како иницијална инвестиција за неговите ветувања. Башка тоа документирано, сосведочено на камера.

До следната нерегуларна идеа, ПОЗДРАВ. О’Кураж за сите инциндентари.